اقوام متحدہ نے پاکستان میں امریکا اور ایران کے درمیان جاری مذاکرات کا خیرمقدم کرتے ہوئے اسے خطے میں امن کے لیے مثبت پیش رفت قرار دیا ہے۔
اقوام متحدہ کے سیکرٹری جنرل انتونیو گوتریس نے مذاکرات کی کامیابی کے حوالے سے امید کا اظہار کیا ہے۔ سیکرٹری جنرل کے ترجمان کی جانب سے جاری پریس بریفنگ میں کہا گیا کہ عالمی ادارہ پاکستان کی ثالثی میں ہونے والی ان اہم سفارتی کوششوں کو سراہتا ہے۔
ترجمان کے مطابق سیکرٹری جنرل نے دونوں ممالک پر زور دیا ہے کہ وہ اس موقع سے فائدہ اٹھاتے ہوئے خلوص نیت کے ساتھ بات چیت کو آگے بڑھائیں تاکہ خطے میں کشیدگی کم ہو اور کسی نئی محاذ آرائی سے بچا جا سکے۔
انہوں نے مزید کہا کہ باہمی افہام و تفہیم اور سنجیدہ مذاکرات کے ذریعے ایک پائیدار اور جامع معاہدے تک پہنچنا ممکن ہے جو خطے میں دیرپا امن کی بنیاد بن سکتا ہے۔