فائیو جی اسپیکٹرم نیلامی کے باوجود موبائل انٹرنیٹ کی رفتار میں نمایاں بہتری نہ آنے پر وزیراعظم شہباز شریف نے نوٹس لیتے ہوئے پاکستان ٹیلی کمیونیکیشن اتھارٹی سے تفصیلی رپورٹ طلب کر لی ہے۔
رپورٹ طلبی کے بعد چیئرمین پی ٹی اے نے وزیراعظم کو بریفنگ دیتے ہوئے آگاہ کیا کہ ٹیلی کام آپریٹرز نیٹ ورک انفرا اسٹرکچر کی بہتری کے لیے 4G اور 5G آلات کی درآمد کے مرحلے میں ہیں۔ آلات کی دستیابی کے بعد تنصیب کا عمل شروع کیا جائے گا جس میں چند ماہ لگنے کا امکان ہے۔
چیئرمین پی ٹی اے کے مطابق انفرا اسٹرکچر میں بہتری کے بعد انٹرنیٹ اسپیڈ میں واضح اضافہ ہوگا جبکہ پہلے مرحلے میں اسلام آباد اور چاروں صوبائی دارالحکومتوں میں 5G سروس متعارف کرائی جائے گی۔ انہوں نے کہا کہ 5G کے ساتھ ساتھ 4G انٹرنیٹ کی رفتار میں بھی نمایاں بہتری آئے گی۔
وزیراعظم شہباز شریف نے ہدایت کی کہ عوام کو تیز رفتار اور معیاری انٹرنیٹ کی فراہمی ہر صورت یقینی بنائی جائے کیونکہ ڈیجیٹل نیشن پاکستان کے وژن کے لیے تیز ترین انٹرنیٹ ناگزیر ہے۔انہوں نے پی ٹی اے کو یہ بھی ہدایت کی کہ ٹیلی کام آپریٹرز کے لیے مقررہ اہداف پر سختی سے عملدرآمد یقینی بنایا جائے۔
چیئرمین پی ٹی اے نے یقین دہانی کرائی کہ ریگولیٹری کردار ادا کرتے ہوئے مؤثر چیک اینڈ بیلنس کے ذریعے نظام کو بہتر بنایا جائے گا۔