پاکستان نے آبنائے ہرمز میں جہازوں اور عملے کی سلامتی، محفوظ آمد و رفت اور معمول کی بحری نقل و حرکت کی فوری بحالی پر زور دیا ہے۔
اقوامِ متحدہ میں پاکستان کے مستقل مندوب عاصم افتخار احمد نے اپنے بیان میں کہا کہ آبنائے ہرمز توانائی اور اشیاء کی ترسیل کے لیے ایک کلیدی بین الاقوامی گزرگاہ ہے، جس کی موجودہ صورتحال پاکستان سمیت کئی ممالک کے لیے معاشی اور تجارتی مشکلات کا باعث بن رہی ہے۔
انہوں نے خبردار کیا کہ عسکری کشیدگی اور رکاوٹیں برقرار رہنے سے مسائل میں اضافہ ہوگا، لہٰذا کسی بھی بحث یا انتظام میں خلیجی تعاون کونسل (جی سی سی) کے ممالک کے جائز مفادات کو مدنظر رکھا جائے۔
پاکستان نے عالمی برادری سے خطے میں کشیدگی کم کرنے اور بحری راستوں کو محفوظ بنانے کے لیے فوری اقدامات کا مطالبہ کیا ہے۔