صدر مملکت آصف علی زرداری اور وزیر اعظم شہباز شریف نے لبنان میں جنگ بندی کے اعلان کا خیرمقدم کرتے ہوئے اسے خطے میں کشیدگی کم کرنے اور امن کی بحالی کی جانب اہم پیش رفت قرار دیا ہے۔
صدر مملکت نے کہا کہ پاکستان خطے کے استحکام کو انتہائی اہمیت دیتا ہے اور پائیدار امن صرف مذاکرات، خودمختاری کے احترام اور بین الاقوامی قوانین کی پاسداری سے ہی ممکن ہے۔ انہوں نے کہا کہ جنگ بندی دیرپا امن کے قیام کے لیے ایک موقع فراہم کرتی ہے۔
انہوں نے لبنان کی خودمختاری اور علاقائی سالمیت کے لیے پاکستان کی مسلسل حمایت کا اعادہ کرتے ہوئے کہا کہ پاکستان امریکا اور ایران کے درمیان کشیدگی کم کرنے کے لیے علاقائی اور بین الاقوامی فریقین سے رابطے میں ہے، کیونکہ مغربی ایشیا میں پائیدار امن کا انحصار تنازعات کی بنیادی وجوہات کے حل پر ہے۔ انہوں نے کہا کہ پاکستان ہر اس سنجیدہ کوشش کی حمایت جاری رکھے گا جو کشیدگی میں کمی اور منصفانہ، دیرپا اور جامع امن کے فروغ میں مدد دے۔
صدر مملکت نے خبردار کیا کہ موجودہ ڈی ایسکلیشن کی صورتحال نازک ہے اور امریکا و ایران کے درمیان دو ہفتوں کی جنگ بندی کے دوران جو وسیع فہم پیدا ہوا تھا، اس میں لبنان میں بھی تحمل کا تصور شامل تھا، جس کی بعد ازاں خلاف ورزی کی گئی۔ انہوں نے کہا کہ کسی بھی فریق کی جانب سے اس جذبے سے انحراف خطے میں کشیدگی کو بڑھا سکتا ہے۔ انہوں نے تمام فریقین پر زور دیا کہ اس نازک موقع پر تحمل اور ذمہ دارانہ رویہ اپنائیں۔
وزیر اعظم پاکستان شہباز شریف نے لبنان میں جنگ بندی کے اعلان کا خیرمقدم کیا ہے اور امید ظاہر کی ہے کہ یہ اقدام خطے میں پائیدار امن کی راہ ہموار کرے گا۔
انھوں نے کہا ہے کہ یہ جنگ بندی سابق امریکی صدر ڈونلڈ ٹرمپ کی سفارتی کوششوں کے نتیجے میں ممکن ہوئی، جسے وہ ایک جرات مندانہ اور دانشمندانہ اقدام قرار دیتے ہیں۔
ترجمان وزیراعظم کے مطابق پاکستان لبنان کی خودمختاری اور علاقائی سالمیت کی مکمل حمایت کرتا ہے اور خطے میں دیرپا امن کے لیے تمام کوششوں کے ساتھ تعاون جاری رکھے گا۔