محکمہ داخلہ پنجاب نے صوبے بھر میں واٹس ایپ ہیکنگ اور نقالی پر مبنی فراڈ کے بڑھتے ہوئے واقعات کے پیش نظر ہنگامی ایڈوائزری جاری کر دی ہے۔
ایڈوائزری میں تمام انتظامی محکموں اور قانون نافذ کرنے والے اداروں کو الرٹ رہنے کی ہدایت کی گئی ہے۔ حکام کے مطابق حالیہ دنوں میں متعدد سرکاری افسران کے واٹس ایپ اکاؤنٹس ہیک ہونے کے واقعات سامنے آئے ہیں۔
محکمہ داخلہ کے مطابق سائبر مجرم ان اکاؤنٹس تک غیر مجاز رسائی حاصل کر کے افسران کے قریبی روابط اور ماتحت عملے کو جعلی پیغامات بھیجتے ہیں جن میں فوری مالی مدد کی درخواست کی جاتی ہے۔
ایڈوائزری میں بتایا گیا ہے کہ فراڈیے عوامی طور پر دستیاب معلومات جیسے نام، عہدہ اور تصاویر استعمال کر کے قابلِ اعتماد ڈیجیٹل شناخت تیار کرتے ہیں جس سے شہری اور سرکاری اہلکار دھوکا کھا جاتے ہیں۔
حکام نے تمام اداروں کو ہدایت کی ہے کہ وہ اس نوعیت کی سرگرمیوں کے خلاف چوکس رہیں اور کسی بھی مشکوک پیغام کی فوری تصدیق کریں۔