وزیر داخلہ و قانون سندھ ضیاء الحسن لنجار نے سندھ بار کونسل میں "وال آف پیس اینڈ صوفی ازم" کا باضابطہ افتتاح کردیا، جس کا مقصد صوفیاء کرام کے امن، محبت اور رواداری کے پیغام کو عام کرنا ہے۔
اس موقع پر تقریب سے خطاب کرتے ہوئے ضیاء الحسن لنجار نے کہا کہ سندھ کی دھرتی صدیوں سے صوفیوں اور امن کا گہوارہ رہی ہے اور صوفی تعلیمات ہی معاشرے میں حقیقی امن و بھائی چارے کی ضامن ہیں۔ انہوں نے واشگاف الفاظ میں کہا کہ صوفی ازم دراصل انسانیت، برداشت اور یکجہتی کا درس دیتا ہے اور وال آف پیس کا قیام اسی روشن روایت کی ایک کڑی ہے جو معاشرے میں رواداری کو فروغ دے گی۔
وزیر قانون کا مزید کہنا تھا کہ سندھ کی اصل پہچان امن اور محبت ہے، اور سندھ بار کونسل میں اس دیوار کے افتتاح سے ایک خوبصورت روایت کا آغاز ہوا ہے۔
تقریب میں وکلاء رہنماؤں قربان ملانو، ایاز تنیو، اشتیاق میمن اور دیگر نے بھی شرکت کی اور اس اقدام کو سندھ کے ثقافتی و اخلاقی ورثے کی بقا کے لیے اہم قرار دیا۔