گرمی کے موسم میں جسم کو ٹھنڈا رکھنے اور اضافی وزن سے نجات حاصل کرنے کے لیے لوگ مختلف طریقے اختیار کرتے ہیں تاہم ماہرین کے مطابق کچی کیری سے تیار کیا جانے والا شربت ایک سادہ مگر انتہائی مؤثر قدرتی حل کے طور پر سامنے آیا ہے۔
یہ مشروب نہ صرف جسمانی درجہ حرارت کو متوازن رکھنے میں مدد دیتا ہے بلکہ کئی طبی فوائد بھی رکھتا ہے۔ خاص طور پر گرمیوں میں بدہضمی، قبض، متلی اور سینے کی جلن جیسے مسائل عام ہو جاتے ہیں جن سے بچاؤ کے لیے کچی کیری کا استعمال مفید سمجھا جاتا ہے۔ یہ شربت نظامِ ہاضمہ کو بہتر بنا کر معدے کی مختلف شکایات کو کم کرنے میں اہم کردار ادا کرتا ہے۔
اس شربت کی تیاری بھی نہایت آسان ہے۔ کچی کیری کے ٹکڑوں کو پانی میں اچھی طرح اُبالا جاتا ہے، پھر اس میں زیرہ پاؤڈر، سونف پاؤڈر، پودینے کے پتے اور ہرا دھنیا شامل کیا جاتا ہے۔
ذائقے کو بہتر بنانے کے لیے تھوڑی مقدار میں گڑ شامل کیا جا سکتا ہے تاہم جو افراد وزن کم کرنا چاہتے ہیں ان کے لیے بغیر گڑ استعمال کرنا زیادہ فائدہ مند ہوتا ہے۔
ماہرین کے مطابق اس مشروب کو دن میں دو مرتبہ استعمال کیا جا سکتا ہے چونکہ یہ گرم پانی میں تیار کیا جاتا ہے، اس لیے گلے پر اس کے مضر اثرات بھی کم ہوتے ہیں۔ باقاعدہ استعمال سے نہ صرف جسم کو ٹھنڈک ملتی ہے بلکہ نظامِ ہاضمہ بہتر ہو کر وزن میں کمی میں بھی مدد ملتی ہے۔
کچی کیری کا یہ سادہ، قدرتی اور آسانی سے تیار ہونے والا شربت تیزی سے مقبول ہو رہا ہے اور گرمی کے موسم میں صحت مند رہنے کے لیے ایک بہترین گھریلو نسخہ سمجھا جا رہا ہے۔