اسلام آباد ہائی کورٹ نے پی ٹی اے ٹربیونل میں فنانس ممبر کی تقرری نہ ہونے کے معاملے پر وزیر اعظم شہباز شریف کو ذاتی حیثیت میں 18 مئی کو طلب کرلیا ہے۔
جسٹس محسن اختر کیانی نے کیس کی سماعت کے دوران وزیر اعظم کو ہدایت کی کہ وہ پیش ہو کر تقرری میں تاخیر کی وضاحت کریں۔ عدالت نے وزیر اعظم ے پرنسپل سیکریٹری اور کابینہ سیکریٹری کو بھی آئندہ سماعت پر طلب کرلیا۔
دورانِ سماعت اسسٹنٹ اٹارنی جنرل نے عدالت کو بتایا کہ ٹربیونل کے لیے ایک ریٹائرڈ جج کو بطور ممبر تعینات کیا جا چکا ہے۔ اس پر جسٹس محسن اختر کیانی نے برہمی کا اظہار کرتے ہوئے کہا کہ ریٹائرڈ ججز کی تعیناتی کا رجحان ٹربیونلز کی کارکردگی پر منفی اثر ڈال رہا ہے اور اکثر ریٹائرمنٹ کے بعد ایسی ذمہ داریاں حاصل کی جاتی ہیں۔
عدالت نے کیس کی مزید سماعت 18 مئی تک ملتوی کرتے ہوئے متعلقہ حکام کو طلبی کے نوٹس جاری کردیے۔