صومالیہ کے قریب بحری قزاقوں کی جانب سے ایک آئل ٹینکر پر حملے کے بعد صورتحال تشویشناک ہوگئی ہے۔ حملے کے بعد جہاز ”آنر 25“ پر موجود پاکستانی عملے کی بحفاظت واپسی کے لیے سفارتی کوششیں مزید تیز کردی گئی ہیں۔
وفاقی وزیر برائے بحری امور جنید انوار چوہدری نے اس معاملے پر صومالیہ کے سفیر کو خط لکھ کر پاکستانی عملے کی فوری اور محفوظ بازیابی میں مدد کی درخواست کی ہے۔ انہوں نے کہا کہ پاکستانی ملاحوں کی جانوں کی حفاظت حکومت کی اولین ترجیح ہے اور ان کی سلامتی یقینی بنانے کے لیے تمام ضروری اقدامات کیے جا رہے ہیں۔
دوسری جانب صومالی وزارت خارجہ کا کہنا ہے کہ واقعے پر مسلسل نظر رکھی جا رہی ہے اور جہاز اور عملے سے متعلق معلومات متعلقہ قومی سلامتی اداروں کے ساتھ شیئر کردی گئی ہیں۔
صومالی حکام نے یقین دہانی کرائی ہے کہ جیسے ہی کوئی نئی پیش رفت سامنے آئے گی، پاکستان کو فوری طور پر آگاہ کیا جائے گا۔