صومالی قزاقوں کے ہاتھوں 10 پاکستانیوں کے اغوا کے معاملے پر صومالیہ کی حکومت نے پاکستان کو تحریری طور پر مکمل تعاون کی یقین دہانی کرا دی ہے۔
سفارتی ذرائع کے مطابق صومالی حکومت نے یقین دہانی کرائی ہے کہ وہ مغوی پاکستانی شہریوں کی محفوظ بازیابی اور وطن واپسی کے لیے ہر ممکن تعاون فراہم کرے گی۔ پاکستان نے یہ معاملہ باضابطہ طور پر صومالی حکام کے ساتھ اٹھایا تھا۔
یاد رہے کہ بحری جہاز صومالی قزاقوں کے قبضے کے بعد 10 سے زائد پاکستانی عملہ یرغمال ہے جن میں کراچی سے تعلق رکھنے والے افراد بھی شامل ہیں۔
دوسری جانب مغویوں کے اہل خانہ شدید پریشانی میں مبتلا ہیں اور انہوں نے حکومت سے فوری اقدامات اور اپنے پیاروں کی بحفاظت واپسی کا مطالبہ کیا ہے۔