برطانوی شہری اولی جنکس اور کینیڈین شہری سیتھ اسکاٹ نے ایک غیر معمولی مہم کے دوران پرانی تین پہیوں والی گاڑی ریلائینٹ روبن کے ذریعے لندن سے جنوبی افریقا کے شہر کیپ ٹاؤن تک تقریباً 14 ہزار میل (22,500 کلومیٹر) کا سفر مکمل کر کے نیا ریکارڈ قائم کر دیا۔
بین الاقوامی میڈیا رپورٹس کے مطابق یہ منفرد سفر 22 ممالک پر مشتمل راستے سے گزرتے ہوئے 120 دن سے زائد عرصے میں مکمل کیا گیا۔
نوجوانوں نے اپنی گاڑی کو محبت سے شیلا کا نام دیا تھا، جو اپنی کمزور ساخت اور بار بار خرابی کے باوجود اس طویل اور مشکل سفر میں ان کا ساتھ دیتی رہی۔
سفر کے دوران دونوں مسافروں کو مختلف خطرناک علاقوں، صحراؤں، پہاڑوں اور جنگلات سے گزرنا پڑا، جبکہ متعدد مقامات پر گاڑی خراب بھی ہوئی، تاہم مقامی افراد اور مکینکس کی مدد سے سفر جاری رکھا گیا۔
اولی جنکس اور سیتھ اسکاٹ کا کہنا ہے کہ یہ مہم ناممکن کو ممکن بنانے کی ایک زندہ مثال ہے۔سفر مکمل ہونے کے بعد گاڑی کو نمائش کے لیے پیش کر دیا گیا ہے جبکہ اسے مستقبل میں میوزیم منتقل کرنے کا بھی منصوبہ بنایا جا رہا ہے۔