پاکستان اور اردن کے درمیان فوجداری معاملات میں باہمی تعاون کا معاہدہ حتمی مراحل میں داخل ہوگیا ہے، جس کے لیے وزارت داخلہ نے وزارت خارجہ کو گرین سگنل دے دیا ہے۔
سرکاری ذرائع کے مطابق مجوزہ معاہدے کے تحت دونوں ممالک دہشت گردی، منشیات اسمگلنگ اور انسانی اسمگلنگ سمیت مختلف جرائم کے خلاف مشترکہ قانونی تعاون کو فروغ دیں گے۔
وزارت داخلہ نے معاہدے کا قانونی مسودہ قانون نافذ کرنے والے اداروں سے رائے کے لیے شیئر کیا تھا، جبکہ وزارت خارجہ کی درخواست پر صوبوں سے بھی مشاورت کی گئی۔ ذرائع کے مطابق تمام متعلقہ اداروں اور صوبوں نے مسودے پر کسی قسم کا اعتراض نہیں اٹھایا۔
بعدازاں وزارت داخلہ نے باضابطہ طور پر وزارت خارجہ کو آگاہ کر دیا ہے کہ معاہدے پر اسے کوئی اعتراض نہیں، جس کے بعد اس پیش رفت کو دونوں ممالک کے درمیان قانونی تعاون بڑھانے کی جانب اہم قدم قرار دیا جا رہا ہے۔
حکام کا کہنا ہے کہ معاہدے کو جلد حتمی شکل دے کر اس پر عملدرآمد شروع کیا جا سکتا ہے، جس سے سرحد پار جرائم کے تدارک میں مدد ملے گی۔