وزیر ٹرانسپورٹ سندھ شرجیل انعام میمن نے کراچی کے لیے مزید الیکٹرک اور ڈبل ڈیکر بسیں لانے کا اعلان کیا ہے۔
شرجیل میمن کی زیر صدارت محکمہ ٹرانسپورٹ و ماس ٹرانزٹ کا اجلاس ہوا جس میں پیپلز بس سروس کے نئے روٹس، ای وی ٹیکسی سروس اور دیگر جاری منصوبوں پر غور کیا گیا۔
اجلاس میں فیصلہ کیا گیا کہ خواتین کے لیے مزید ایک ہزار پنک ای وی اسکوٹیز فراہم کی جائیں گی جبکہ کراچی کے لیے نئی ای وی اور ڈبل ڈیکر بسیں بھی شامل کی جائیں گی۔
شرجیل میمن کے مطابق صوبے میں ماس ٹرانزٹ نظام کو وسعت دیتے ہوئے انٹر سٹی پیپلز بس سروس شروع کی جا رہی ہے جس کے تحت خیرپور تا روہڑی اور خیرپور تا رانی پور روٹس آئندہ ہفتے شروع ہوں گے۔
انہوں نے مزید بتایا کہ جلد ہی لاڑکانہ، دادو، سیہون، حیدرآباد اور سانگھڑ سمیت دیگر اضلاع میں بھی انٹر سٹی بس سروس کا آغاز کیا جائے گا۔