ترجمان سوئی سدرن گیس کمپنی کا کہنا ہے کہ جیل چورنگی پر بی آر ٹی تعمیراتی کام کے دوران متاثر ہونے والی سوئی گیس کی مین پائپ لائن کی مرمت کا کام مکمل کرلیا گیا ہے، جس کے بعد متاثرہ علاقوں میں گیس کی فراہمی بحال کردی گئی ہے۔
ترجمان کے مطابق بی آر ٹی منصوبے پر کام کے دوران غفلت کے باعث گزشتہ رات 12 انچ قطر کی ہائی پریشر گیس پائپ لائن کو نقصان پہنچا تھا۔ اس فنی خرابی کی وجہ سے صدر، گارڈن، جمشید روڈ، پی آئی بی کالونی، لیاری، لائنز ایریا اور ملحقہ علاقوں میں گیس کی فراہمی معطل ہوگئی تھی، جس سے شہریوں کو شدید مشکلات کا سامنا کرنا پڑا۔
سوئی سدرن کی فنی ٹیموں نے ہنگامی بنیادوں پر مرمتی کام مکمل کیا، جس کے بعد نظام میں گیس کا پریشر بحال کر دیا گیا ہے۔ ترجمان نے تصدیق کی ہے کہ اب تمام متاثرہ علاقوں میں گیس کی سپلائی دوبارہ شروع ہوچکی ہے۔