کراچی پورٹ ٹرسٹ کی جانب سے معرکہ حق کی پہلی سالگرہ کے موقع پر پاکستان کی مسلح افواج کی لازوال بہادری، استقامت اور عظیم قربانیوں کو خراجِ تحسین پیش کرنے کے لیے ایک پروقار بوٹ ریلی نکالی گئی۔
اس تقریب میں پورٹ فورس، پاک بحریہ کے اہلکاروں اور مقامی ماہی گیروں کی بڑی تعداد نے اپنی کشتیوں کے ساتھ جوش و جذبے سے شرکت کی۔ شرکاء نے سمندر کی لہروں پر قومی یکجہتی اور اتحاد کا مظاہرہ کرتے ہوئے وطن کے محافظوں سے اپنی گہری عقیدت کا اظہار کیا۔
کراچی پورٹ ٹرسٹ کے حکام کا اس موقع پر کہنا تھا کہ بھارتی جارحیت کے خلاف پاکستان کی مسلح افواج کی بے مثال جرات اور مؤثر جواب قوم کے حافظے میں ہمیشہ سنہری حروف سے رقم رہے گا۔ کے پی ٹی اُن تمام بہادر سپاہیوں کو سلامِ عقیدت پیش کرتا ہے جن کی قربانیاں اور فرض شناسی پاکستان کی خودمختاری، وقار اور سلامتی کے تحفظ کی ضامن ہیں۔