پاکستان میں آئندہ چند روز کے دوران انٹرنیٹ صارفین کو سروس میں عارضی سست روی یا تعطل کا سامنا کرنا پڑسکتا ہے، کیونکہ عالمی سب میرین کیبل کی مرمت کا کام شروع کیا جا رہا ہے۔
پاکستان ٹیلی کمیونی کیشن اتھارٹی (پی ٹی اے) نے اس حوالے سے آگاہ کرتے ہوئے بتایا ہے کہ مرمتی سرگرمیوں کے دوران انٹرنیٹ سروس متاثر ہونے کا خدشہ موجود ہے۔
پی ٹی سی ایل کے مطابق 11 مئی سے 18 مئی تک عالمی سب میرین کیبل کی مرمت کی جائے گی۔ کمپنی کا کہنا ہے کہ اس دوران بالخصوص شام کے اوقات میں انٹرنیٹ کی رفتار میں کمی یا سروس میں عارضی خلل آ سکتا ہے۔
پی ٹی سی ایل نے مزید بتایا کہ سب میرین کیبل کی مرمت کا کام بین الاقوامی کیبل کنسورشیم کی جانب سے انجام دیا جائے گا، جبکہ صارفین کو بہتر سہولت فراہم کرنے کے لیے متبادل انتظامات بھی کیے جا رہے ہیں۔