حکومت نے عالمی ٹرانزٹ ٹریفک بڑھانے اور گوادر پورٹ کو علاقائی لاجسٹکس مرکز بنانے کے لیے بندرگاہی ٹیرف میں نمایاں کمی کا اعلان کر دیا ہے۔
وزیر بحری امور جنید انور کے مطابق کنٹینر بردار جہازوں کی برتھنگ فیس میں 25 فیصد کمی کی گئی ہے جبکہ انٹرنیشنل ٹرانس شپمنٹ کنٹینرز پر پورٹ چارجز میں 40 فیصد تک کمی کی گئی ہے۔
انہوں نے بتایا کہ ٹرانزٹ کنٹینر کارگو پر بھی پورٹ چارجز 31 فیصد تک کم کیے گئے ہیں جبکہ جنرل کارگو کے لیے ایک ماہ مفت اسٹوریج سہولت بھی متعارف کرا دی گئی ہے۔
وزیر بحری امور کا کہنا تھا کہ نئے ٹیرف سے شپنگ لائنز کے آپریشنل اخراجات میں نمایاں کمی آئے گی اور گوادر بندرگاہ پر کارگو ہینڈلنگ اور معاشی سرگرمیوں میں اضافہ متوقع ہے۔
چیئرمین گوادر پورٹ نور الحق بلوچ نے کہا کہ ان اقدامات سے بلوچستان میں روزگار کے نئے مواقع پیدا ہوں گے اور گوادر کی تجارتی اہمیت مزید بڑھے گی۔