وزیراعلیٰ بلوچستان میر سرفراز بگٹی نے کہا ہے کہ انٹیلیجنس ایجنسیوں نے بروقت کارروائی کرتے ہوئے پاکستان کو ایک بڑی تباہی سے بچا لیا اور بلوچستان سے ایک خاتون خودکش بمبار کو گرفتار کیا گیا۔
کوئٹہ میں پریس کانفرنس کے دوران وزیراعلیٰ بلوچستان نے گرفتار خاتون کے ہمراہ گفتگو کرتے ہوئے بتایا کہ مذکورہ خاتون کو اسلام آباد میں خودکش حملے کا ہدف دیا گیا تھا تاہم سیکیورٹی اداروں نے بروقت کارروائی کرکے دہشت گردی کا منصوبہ ناکام بنا دیا۔
ان کا کہنا تھا کہ دہشت گردوں کا بلوچستان کی روایات سے کوئی تعلق نہیں اور یہ عناصر اپنی مذموم مقاصد کے لیے معصوم بچیوں کا استحصال کر رہے ہیں۔ انہوں نے کہا کہ ریاست بچیوں کو تعلیم دینا چاہتی ہے جبکہ دہشت گرد انہیں خودکش حملوں کے لیے استعمال کرتے ہیں۔
وزیراعلیٰ نے مزید کہا کہ گرفتار خاتون کو باعزت طریقے سے اس کے والد کے حوالے کیا جا رہا ہے انہوں نے انٹیلیجنس اداروں کو خراج تحسین پیش کرتے ہوئے کہا کہ ان کی بروقت کارروائی سے ایک بڑی تباہی ٹل گئی۔