کوہاٹ میں خودکش دہشت گرد کو روک کر قیمتی جانیں بچانے والے شہری لیاقت کی قربانی کے اعتراف میں صدر مملکت آصف علی زرداری نے ستارۂ شجاعت دینے کی منظوری دے دی ہے۔
یہ منظوری وزیرِ اعظم شہباز شریف کی سفارش پر دی گئی جس میں لیاقت شہید کی جرات، فرض شناسی اور بہادری کو خراجِ تحسین پیش کیا گیا۔
صدر مملکت نے کہا کہ لیاقت شہید نے اپنی جان قربان کرکے بڑے جانی نقصان کو ٹال دیا اور قوم کے لیے ایک روشن مثال قائم کی۔ ان کا کہنا تھا کہ لیاقت شہید نے خودکش حملہ آور کے سامنے ڈٹ کر غیر معمولی بہادری کا مظاہرہ کیا۔
اعلامیے کے مطابق لیاقت شہید کے اہل خانہ جن میں ان کی والدہ، صاحبزادہ اور بھائی شامل ہیں آج شام ستارۂ شجاعت وصول کریں گے۔ اہل خانہ کو اسلام آباد آمد کے لیے مکمل سرکاری پروٹوکول دیا گیا ہے جبکہ ایلیٹ فورس کا دستہ بھی ان کے ہمراہ ہے۔