وفاقی وزیر برائے منصوبہ بندی احسن اقبال نے این ایف سی ایوارڈ کے تحت ان صوبوں کے لیے مراعات متعارف کرانے کی تجویز پیش کی ہے جو آبادی میں اضافے کو کامیابی سے کنٹرول کریں گے۔
اسلام آباد میں قومی و صوبائی آبادی تخمینے 50-2023 کی تقریب سے خطاب کرتے ہوئے احسن اقبال نے کہا کہ آبادی میں تیزی سے اضافہ پاکستان کی پائیدار ترقی، معاشی استحکام اور وسائل کے مؤثر استعمال کے لیے بڑا چیلنج بن چکا ہے۔
انہوں نے خبردار کیا کہ موجودہ شرح برقرار رہی تو 2050 تک پاکستان کی آبادی 37 سے 40 کروڑ تک پہنچ سکتی ہے جس سے صحت، تعلیم، روزگار، پانی اور خوراک سمیت بنیادی سہولیات پر شدید دباؤ بڑھے گا۔
وفاقی وزیر نے زور دیا کہ معاشی ترقی اور قومی استحکام کے لیے متوازن آبادی ناگزیر ہے اسی لیے آبادی پر قابو پانے والے صوبوں کو این ایف سی ایوارڈ میں خصوصی مراعات دی جانی چاہئیں۔