امریکا اور ایران کے درمیان بڑھتی ہوئی کشیدگی کے تناظر میں حکومتِ پاکستان نے اہم ممالک میں تعینات اپنے سفیروں سے مشاورت کا فیصلہ کرلیا ہے۔
ذرائع کے مطابق اسلام آباد میں پاکستانی سفرا کی دو روزہ منی کانفرنس کل سے شروع ہوگی، جس میں مشرق وسطیٰ اور دیگر اہم خطوں میں تعینات سفرا کو شرکت کیلیے طلب کیا گیا ہے۔
کانفرنس میں امریکا سمیت مختلف اہم ممالک میں تعینات پاکستانی سفرا شریک ہوں گے جبکہ سعودی عرب، متحدہ عرب امارات، قطر، کویت، عمان اور اردن میں تعینات سفارتی نمائندے بھی اجلاس میں شرکت کریں گے۔
ذرائع کا کہنا ہے کہ اجلاس میں خطے کی موجودہ صورتحال، ممکنہ سفارتی اثرات اور پاکستان کے کردار پر تفصیلی غور کیا جائے گا۔ اس موقع پر خطے میں امن و استحکام کیلیے پاکستان کی سفارتی حکمت عملی اور ممکنہ ثالثی کردار سے متعلق مختلف تجاویز بھی زیرِ بحث آئیں گی۔
ذرائع کے مطابق کانفرنس کے بعد تیار کی جانے والی سفارشات حکومت کو پیش کی جائیں گی، جن کی روشنی میں آئندہ کا سفارتی لائحہ عمل طے کیا جائے گا۔