حکومت نے عیدالاضحیٰ سے قبل جدید سہولتوں سے مزین ’’عوام ایکسپریس‘‘ ٹرین چلانے کا اعلان کردیا ہے، جبکہ ٹرین کا باقاعدہ افتتاح 24 مئی کو کیا جائے گا۔
وفاقی وزیر ریلوے حنیف عباسی نے کہا ہے کہ عوام ایکسپریس کو مکمل اپ گریڈ کرکے عید سے قبل مسافروں کے لیے پیش کیا جائے گا۔ ان کے مطابق نئی سہولتوں سے آراستہ ٹرین مسافروں کو تیز، آرام دہ اور معیاری سفری سہولیات فراہم کرے گی اور کم وقت میں کراچی پہنچے گی۔
وزیر ریلوے کا کہنا تھا کہ عوام کو محفوظ، معیاری اور آرام دہ سفری سہولیات فراہم کرنا حکومت کا وژن ہے، جبکہ ریلوے نظام کو جدید خطوط پر استوار کرنے کے لیے عملی اقدامات جاری ہیں۔
حنیف عباسی نے مزید کہا کہ پاکستان ریلوے میں بہتری اور مسافروں کی سہولت اولین ترجیح ہے اور مستقبل میں ہر بڑے شہر سے ایک پرائم ٹرین چلانے کا منصوبہ بھی زیر غور ہے۔