وفاقی دارالحکومت اسلام آباد میں فوجی اعزازات دینے کی پروقار تقریب جاری ہے، جس میں افواجِ پاکستان کے افسران اور جوانوں کو بہادری اور نمایاں خدمات کے اعتراف میں اعزازات سے نوازا جارہا ہے۔
تقریب کے دوران لیفٹیننٹ کرنل محمد علی شوکت شہید کو ان کی قربانی اور جرات کے اعتراف میں ستارۂ بسالت عطا کیا گیا۔ اسی اعزاز سے سپاہی صوبان مجید بلوچ شہید کو بھی بعد از شہادت نوازا گیا۔
سپاہی اسرار محمد کو دورانِ ڈیوٹی غیر معمولی بہادری کا مظاہرہ کرنے پر ستارۂ بسالت سے نوازا گیا۔
فضائیہ کے سینئر افسران میں ایئر مارشل کاشف قمر کو شاندار پیشہ ورانہ کارکردگی پر ہلالِ امتیاز (ملٹری) عطا کیا گیا، جبکہ ایئر مارشل عامر شہزاد کو نمایاں خدمات کے اعتراف میں ہلالِ امتیاز (ملٹری) سے نوازا گیا۔
تقریب میں اعلیٰ عسکری حکام، افسران، جوانوں اور اعزازات حاصل کرنے والوں کے اہلِ خانہ نے شرکت کی، جبکہ شہداء کی قربانیوں اور سیکیورٹی فورسز کی خدمات کو خراجِ تحسین پیش کیا گیا۔