پاکستان پیپلز پارٹی کے چیئرمین بلاول بھٹو زرداری نے کوئٹہ میں پیپلز ایئر ایمبولینس اور بے نظیر ایمبولینس سروس کا افتتاح کر دیا۔
پیپلز ایئر ایمبولینس کے ذریعے بلوچستان کے دور دراز علاقوں میں فوری طبی امداد اور مریضوں کی ہنگامی منتقلی ممکن بنائی جائے گی۔ ایئر ایمبولینس میں جدید طبی آلات، آکسیجن سسٹم اور مانیٹرنگ مشینیں نصب کی گئی ہیں جبکہ نوزائیدہ بچوں کی منتقلی کے لیے خصوصی انکیوبیٹر بھی شامل کیا گیا ہے۔
تقریب سے خطاب کرتے ہوئے بلاول بھٹو زرداری نے کہا کہ شہریوں کو علاج کی بہترین سہولت فراہم کرنا چاہتے ہیں اور وسائل کی کمی کسی مریض کے علاج میں رکاوٹ نہیں بننی چاہیے۔
انہوں نے کہا کہ کوشش ہے عوام کو ان کے گھر کی دہلیز پر طبی سہولتیں فراہم کی جائیں تاکہ دور دراز علاقوں کے لوگ بھی بروقت علاج حاصل کر سکیں۔
بلاول بھٹو زرداری کا کہنا تھا کہ بلوچستان سمیت پورا خطہ مختلف مشکلات سے گزر رہا ہے جن کے باعث معاشی چیلنجز بھی پیدا ہو رہے ہیں، تاہم عوام کو صحت کی بہتر سہولتیں فراہم کرنا حکومت کی ترجیح ہے۔