سوئی سدرن گیس کمپنی نے کراچی کے مختلف علاقوں میں گیس کی عارضی بندش اور معطلی کا اعلان کیا ہے۔
ترجمان ایس ایس جی سی کے مطابق، نیپا فلائی اوور کے قریب گیس پائپ لائنز کی لوئرنگ (تبدیلی و مرمت) کا کام ہفتہ اور اتوار کی درمیانی شب انجام دیا جائے گا، جس کے لیے شیڈولڈ شٹ ڈاؤن کیا جا رہا ہے۔ یہ کام رات 10 بجے سے صبح 5 بجے تک مکمل کرنے کی کوشش کی جائے گی، تاہم تکنیکی نوعیت کے پیش نظر کام اتوار کی صبح 8 بجے تک بھی جاری رہ سکتا ہے۔
اس مہم کے دوران شہر کے متعدد اہم اور رہائشی علاقوں بشمول لیاقت نیشنل اسپتال، آغا خان اسپتال، سینٹرل جیل اور اس کے اطراف کے علاقوں میں گیس کی فراہمی بند رہے گی۔ اس کے علاوہ گلشنِ اقبال کے تمام بلاکس، پی آئی بی کالونی، جمشید روڈ، لائنز ایریا، پی ایچ ایس سوسائٹی، صدر اور کھارادر کے بعض علاقوں میں بھی گیس معطل رہے گی۔
ترجمان نے مزید بتایا کہ لیاری، گارڈن اور اس کے قریبی علاقوں میں گیس کی فراہمی اتوار کی صبح 8 بجے تک بند رہ سکتی ہے، جبکہ سائٹ انڈسٹریل ایریا کے صنعتی صارفین کو گیس کے کم پریشر کا سامنا کرنا پڑ سکتا ہے۔