فلسطین پر غاصب صیہونی ریاست اسرائیل کے ناجائز تسلط کے 78 سال مکمل ہونے پر فلسطین فاؤنڈیشن پاکستان کی اپیل پر 15 مئی کو ملک بھر میں فلسطینی عوام سے یکجہتی کے لیے 'یومِ نکبہ' بعنوان 'یومِ واپسی مہم' منایا گیا۔
اس سلسلے میں ملک بھر کی جامع مساجد میں بعد نمازِ جمعہ فلسطینیوں کے حقِ واپسی کی حمایت کی گئی اور اسرائیلی مظالم کی شدید مذمت کی گئی۔ مہم کا مرکزی احتجاج کراچی پریس کلب کے سامنے ہوا، جس میں مختلف سیاسی و مذہبی جماعتوں کے رہنماؤں، وکلا، اساتذہ، سول سوسائٹی، طلبہ اور خواتین سمیت مختلف مکاتبِ فکر کے افراد نے بڑی تعداد میں شرکت کی۔ مظاہرین نے پاکستان، فلسطین، ایران اور لبنان کے پرچم اور شہدا کی تصاویر اٹھا رکھی تھیں اور انہوں نے امریکہ و اسرائیل کے خلاف شدید نعرے بازی کی۔
مظاہرے سے ڈاکٹر صابر ابو مریم، معراج الہدیٰ، اسرار عباسی، ارم بٹ، علامہ باقر عباس، علامہ عقیل انجم، یونس بونیری، ندیم اعوان، اور اقلیتی برادری کے رہنماؤں وجے مہاراج اور سردار منگن سنگھ سمیت دیگر مقررین نے خطاب کیا۔
انہوں نے واضح کیا کہ قائد اعظم محمد علی جناح کے فرامین کے مطابق اسرائیل ایک غیر قانونی اور ناجائز ریاست ہے جسے پاکستان کبھی تسلیم نہیں کرے گا۔ مقررین نے حکومت سے مطالبہ کیا کہ قومی اسمبلی اور سینیٹ میں فلسطینیوں کے حقِ واپسی کے لیے قراردادیں منظور کی جائیں۔
انہوں نے مشرقِ وسطیٰ میں جاری جنگ کی مذمت کرتے ہوئے عالمی برادری سے فلسطین، لبنان اور ایران پر امریکی و اسرائیلی جارحیت فوری بند کرانے اور مستقل جنگ بندی کا مطالبہ کیا۔ اس کے علاوہ مقررین نے معرکہِ حق اور بنیان المرصوص کی کامیابی کا ایک سال مکمل ہونے پر عوام، حکومت اور افواجِ پاکستان کو مبارکباد بھی پیش کی۔