اسٹیٹ بینک آف پاکستان کی جانب سے جاری کردہ اعدادوشمار کے مطابق پاکستان کی آئی ٹی برآمدات میں ریکارڈ اضافہ دیکھنے میں آیا ہے جس نے ماضی کے تمام ریکارڈ توڑ دیے ہیں۔
اعدادوشمار کے مطابق اپریل کے دوران پاکستان نے آئی ٹی برآمدات سے 42 کروڑ 40 لاکھ ڈالر کمائے جبکہ سالانہ بنیاد پر اس شعبے میں 33 فیصد کا نمایاں اضافہ ریکارڈ کیا گیا۔
رواں مالی سال کے ابتدائی 10 ماہ میں آئی ٹی برآمدات 3 ارب 81 کروڑ ڈالر تک پہنچ گئیں جو ملکی تاریخ کا نیا ریکارڈ ہے۔ اسی عرصے میں آئی ٹی ایکسپورٹس میں 21 فیصد اضافہ بھی سامنے آیا ہے۔
ماہرین کے مطابق اگر یہی رفتار برقرار رہی تو رواں مالی سال کے اختتام تک پاکستان کی آئی ٹی برآمدات پہلی بار ساڑھے 4 ارب ڈالر سے تجاوز کر جائیں گی۔
معاشی تجزیہ کاروں کا کہنا ہے کہ پاکستان میں فری لانسنگ، سافٹ ویئر سروسز اور ڈیجیٹل معیشت کے لیے سازگار ماحول نے آئی ٹی سیکٹر کی ترقی میں اہم کردار ادا کیا ہے۔