وفاقی وزیر داخلہ محسن نقوی نے کہا ہے کہ وہ حالیہ علاقائی صورتحال کے تناظر میں سپریم لیڈر کے لیے خصوصی پیغام اور فیلڈ مارشل کا خط لے کر تہران پہنچے ہیں۔
ایرانی ہم منصب اسکندر مومنی سے ملاقات کے بعد میڈیا سے گفتگو کرتے ہوئے محسن نقوی نے بتایا کہ وہ سپریم لیڈر آیت اللہ سید مجتبیٰ حسینی خامنہ ای کے لیے وزیراعظم شہباز شریف کا پیغام بھی ساتھ لائے ہیں۔
ملاقات کے دوران دونوں وزرائے داخلہ نے علاقائی سلامتی کی صورتحال کا تفصیلی جائزہ لیا اور باہمی دلچسپی کے امور پر تبادلہ خیال کیا۔ گفتگو میں دوطرفہ تعاون اور خطے میں استحکام سے متعلق معاملات بھی زیر غور آئے۔
عرب میڈیا رپورٹس کے مطابق دورے کے دوران ایران اور پاکستان کے درمیان ایک مفاہمتی یادداشت (MoU) پر پیش رفت کے امکانات پر بھی بات چیت متوقع ہے۔ محسن نقوی اس سے قبل بھی دو مرتبہ ایران کا دورہ کرچکے ہیں۔
ذرائع کے مطابق ایران کے منجمد فنڈز سے متعلق معاملات میں کچھ پیش رفت ہوئی ہے، تاہم فنڈز کے حجم اور ان کی واپسی کے طریقہ کار پر اختلافات برقرار ہیں۔
دوسری جانب غیر مصدقہ رپورٹس میں یہ بھی دعویٰ کیا گیا ہے کہ سابق امریکی صدر ڈونلڈ ٹرمپ نے ثالثی کرنے والے فریقین کو آگاہ کیا ہے کہ 60 دن سے زیادہ طویل مذاکرات کی گنجائش نہیں ہوگی۔