گلگت بلتستان کے عام انتخابات میں 24 جنرل نشستوں پر ووٹوں کی گنتی کا سلسلہ جاری ہے، جبکہ اب تک 24 میں سے 15 حلقوں کے غیرسرکاری اور غیرحتمی نتائج موصول ہوچکے ہیں۔
غیرحتمی نتائج کے مطابق پاکستان پیپلز پارٹی 6 نشستوں کے ساتھ آگے ہے، مسلم لیگ (ن) 3 نشستیں حاصل کرنے میں کامیاب ہوئی ہے، جبکہ مجلس وحدت مسلمین نے ایک نشست جیت لی ہے۔ اس کے علاوہ 5 آزاد امیدوار بھی کامیاب قرار دیے گئے ہیں۔
دوسری جانب جی بی اے-15، جی بی اے-16، جی بی اے-17 اور جی بی اے-18 کے نتائج میں تاخیر پر ڈی آر او آفس کے باہر آزاد امیدواروں اور ان کے حامیوں نے احتجاج کیا۔ مظاہرین نے نتائج میں تاخیر پر تحفظات کا اظہار کرتے ہوئے اسے انتخابی عمل کو مشکوک بنانے کے مترادف قرار دیا۔
صورتحال اس وقت کشیدہ ہو گئی جب پولیس نے مظاہرین کو منتشر کرنے کے لیے کارروائی کی اور مبینہ طور پر شیلنگ بھی کی گئی۔ امیدواروں کا مؤقف ہے کہ نتائج میں تاخیر سے انتخابی شفافیت پر سوالات اٹھ رہے ہیں۔
انتخابی حکام کے مطابق باقی حلقوں کے نتائج کا اعلان مرحلہ وار جاری ہے، جبکہ صورتحال کی نگرانی کی جا رہی ہے۔