اسلام آباد ہائی کورٹ میں کچہری خودکش دھماکے کے متاثرین کو معاوضہ کی عدم ادائیگی سے متعلق درخواست پر سماعت ہوئی، جس میں عدالت نے متعلقہ حکام کو معاملہ جلد حل کرنے کی ہدایت جاری کر دی۔
سماعت جسٹس ارباب محمد طاہر نے درخواست گزار آصف گجر ایڈووکیٹ کی درخواست پر کی۔ درخواست گزار کی جانب سے بیرسٹر تصدق حنیف عدالت میں پیش ہوئے۔
دورانِ سماعت مؤقف اختیار کیا گیا کہ سیکشن 13 لائرز پروٹیکشن ایکٹ کے تحت متاثرین کو گریڈ 18 کے شہدا پیکج کے مطابق معاوضہ ملنا چاہیے، تاہم کچہری سانحے کو ایک سال سے زائد کا عرصہ گزرنے کے باوجود متاثرین کو تاحال ادائیگی نہیں کی گئی۔
عدالت نے ایڈووکیٹ جنرل اسلام آباد نوید حیات ملک اور ڈپٹی اٹارنی جنرل کو ہدایت کی کہ وہ معاملہ حل کرانے کے لیے اقدامات کریں اور پیش رفت سے آگاہ کریں۔ ایڈووکیٹ جنرل اسلام آباد نے عدالت سے مہلت کی استدعا کرتے ہوئے مؤقف اختیار کیا کہ معاملے کو جلد حل کرنے کی کوشش کی جائے گی۔
عدالتی طلبی پر ایڈووکیٹ جنرل اسلام آباد عدالت میں پیش ہوئے اور یقین دہانی کرائی کہ مسئلہ جلد حل کرایا جائے گا۔ بعد ازاں عدالت نے وفاق، سیکریٹری داخلہ، چیف کمشنر اور ڈپٹی کمشنر اسلام آباد کو نوٹس جاری کرتے ہوئے سماعت 23 جون تک ملتوی کردی۔