ایرانی صدر کے سرکاری دورۂ پاکستان کے موقع پر وفاقی دارالحکومت کے ریڈ زون میں سیکیورٹی کے غیرمعمولی انتظامات کیے گئے ہیں، جس کے پیش نظر اسلام آباد ہائیکورٹ کو آج کے لیے بند رکھنے کا فیصلہ کیا گیا ہے۔
اسلام آباد ہائیکورٹ کے رجسٹرار کی جانب سے چیف جسٹس کی منظوری کے بعد جاری نوٹیفکیشن میں کہا گیا ہے کہ آج کی تمام کاز لسٹ منسوخ کر دی گئی ہے جبکہ عدالتی عملے کو گھروں سے کام کرنے کی ہدایت جاری کی گئی ہے۔
نوٹیفکیشن کے مطابق ایرانی صدر کی آمد کے باعث ریڈ زون میں داخلے پر عائد پابندیوں سے سائلین، وکلا اور عدالتی عملے کو ہائیکورٹ تک رسائی میں مشکلات پیش آ سکتی ہیں، اسی لیے آج اسلام آباد ہائیکورٹ میں کوئی عدالتی کارروائی نہیں ہوگی۔
دوسری جانب ضلعی عدالتیں معمول کے مطابق کھلی رہیں گی اور وہاں عدالتی امور بلا تعطل جاری رہیں گے۔