ایرانی صدر مسعود پزشکیان کے آج کے دورۂ پاکستان کے پیش نظر وفاقی دارالحکومت میں سیکیورٹی کے سخت انتظامات کیے گئے ہیں، جس کے باعث اسلام آباد میں میٹرو بس سروس مکمل طور پر بند رکھنے کا فیصلہ کیا گیا ہے۔
میٹرو بس انتظامیہ کے مطابق راولپنڈی میں میٹرو بس سروس صبح 6 بجے سے شام 7 بجے تک معمول کے مطابق جاری رہے گی، جبکہ صدر اسٹیشن سے فیض آباد تک سروس بحال رکھی جائے گی۔ تاہم آئی جے پی روڈ سے پاک سیکریٹریٹ تک میٹرو بس سروس آج معطل رہے گی۔
حکام نے بتایا کہ سیکیورٹی وجوہات کی بنا پر اسلام آباد کے تمام ٹریلز بھی عارضی طور پر بند کر دیے گئے ہیں۔
دوسری جانب ایرانی صدر مسعود پزشکیان آج سرکاری دورے پر پاکستان پہنچ رہے ہیں۔ ایرانی حکام کے مطابق اس دورے کا مقصد ایران اور امریکا کے درمیان سفارتی پیش رفت میں پاکستان کے کردار اور ثالثی کی کوششوں کو سراہنا ہے۔ ذرائع کے مطابق ایرانی صدر اپنے دورے کے دوران وزیراعظم شہباز شریف کا شکریہ بھی ادا کریں گے۔
ایرانی صدر کی آمد کے موقع پر وفاقی دارالحکومت کو خصوصی طور پر سجایا گیا ہے جبکہ سیکیورٹی کے غیرمعمولی انتظامات کیے گئے ہیں۔