نیشنل ڈیزاسٹر مینجمنٹ اتھارٹی (این ڈی ایم اے) نے آج سے 3 جولائی تک ملک کے مختلف علاقوں میں وقفے وقفے سے پری مون سون بارشوں کی پیش گوئی کرتے ہوئے شمالی علاقوں میں ممکنہ خطرات سے خبردار کیا ہے۔
این ڈی ایم اے کے مطابق شدید گرمی اور متوقع بارشوں کے باعث گلگت بلتستان، خیبر پختونخوا اور آزاد کشمیر میں گلیشیئرز کے تیزی سے پگھلنے کا خدشہ ہے، جس سے دریاؤں اور ندی نالوں میں پانی کی سطح اچانک بلند ہوسکتی ہے۔ اس کے علاوہ گلیشیائی جھیلیں پھٹنے، فلیش فلڈز اور لینڈ سلائیڈنگ کے امکانات بھی موجود ہیں۔
ادارے نے ہنزہ، نگر، غذر، اسکردو، شگر، گانچھے، کھرمنگ، استور، دیامر، اپر و لوئر چترال اور سوات سمیت حساس علاقوں کے مکینوں، سیاحوں اور مسافروں کو غیر ضروری سفر سے گریز اور احتیاطی تدابیر اختیار کرنے کی ہدایت کی ہے۔
این ڈی ایم اے کا کہنا ہے کہ دریاؤں، ندی نالوں، گلیشیائی جھیلوں اور دریا کناروں کے قریب غیر ضروری نقل و حرکت سے اجتناب کیا جائے اور کسی بھی غیر معمولی صورتحال کی فوری اطلاع متعلقہ انتظامیہ کو دی جائے۔ ادارے نے صوبائی ڈیزاسٹر مینجمنٹ اتھارٹیز کو بھی ممکنہ ہنگامی حالات سے نمٹنے کے لیے الرٹ رہنے کی ہدایت جاری کردی ہے۔