لاہور شہر میں کم عمر اور بغیر ڈرائیونگ پرمٹ گاڑی چلانے والوں کے خلاف سخت کریک ڈاؤن کا آغاز کر دیا گیا ہے جس کے تحت ٹریفک پولیس کو خصوصی ہدایات جاری کر دی گئی ہیں۔
حکام کے مطابق 16 سے 18 سال کی عمر کے ایسے نوجوان جو بغیر لائسنس یا پرمٹ موٹرسائیکل یا گاڑی چلاتے ہوئے پائے جائیں گے، ان کے خلاف فوری کارروائی عمل میں لائی جائے گی اور گاڑیاں و موٹرسائیکلیں تحویل میں لے لی جائیں گی۔
سی ٹی او لاہور کا کہنا ہے کہ کم عمر موٹرسائیکل سواروں کی گاڑیاں اس وقت تک واپس نہیں کی جائیں گی جب تک وہ باقاعدہ ڈرائیونگ پرمٹ حاصل نہیں کر لیتے جبکہ کم عمر کار ڈرائیورز کی گاڑیاں والدین کی جانب سے شورٹی بانڈ جمع کرانے کے بعد ہی ریلیز کی جائیں گی۔
انہوں نے بتایا کہ شہریوں کی سہولت کے لیے لاہور میں 13 مختلف مقامات پر ڈرائیونگ پرمٹ کے اجرا کی سہولت فراہم کی گئی ہے، تاکہ نوجوان آسانی سے لائسنس حاصل کر سکیں۔
سی ٹی او لاہور نے والدین سے اپیل کی ہے کہ وہ اپنے 16 سے 18 سال کے بچوں کے ڈرائیونگ پرمٹ لازمی بنوائیں اور انہیں ٹریفک قوانین کی پابندی کا پابند کریں۔
ان کا کہنا تھا کہ بغیر پرمٹ کم عمر افراد کی ڈرائیونگ کسی صورت برداشت نہیں کی جائے گی اور قانون کی خلاف ورزی کرنے والوں کے خلاف بلاامتیاز کارروائی جاری رہے گی۔