لاہور ہائیکورٹ نے دورانِ ڈکیتی قتل کے مقدمے میں مجرم محمد رضوان کی اپیل مسترد کرتے ہوئے اس کی سزائے موت برقرار رکھنے کا حکم دے دیا۔
جسٹس شہرام سرور چوہدری اور جسٹس محمد طارق ندیم پر مشتمل دو رکنی بینچ نے کیس کی سماعت کے بعد ٹرائل کورٹ کی جانب سے سنائی گئی پھانسی کی سزا کی توثیق کردی۔
عدالت میں بتایا گیا کہ محمد رضوان پر 2020 میں ڈکیتی کے دوران شہباز محمود کو قتل کرنے کا الزام ثابت ہوا تھا، جبکہ سرکاری وکیل کے مطابق ملزم کو وقوعہ کے مقام سے ہی گرفتار کر لیا گیا تھا۔
پراسیکیوشن کے مطابق ملزم کے خلاف قتل کا مقدمہ فیصل آباد کے تھانہ بٹالہ کالونی میں درج کیا گیا تھا۔
ڈپٹی پراسیکیوٹر جنرل شیخ محمد آصف نے عدالت میں ملزم کی اپیل کی مخالفت کی، جبکہ وکیل صفائی نے بریت کے لیے دلائل پیش کیے، تاہم وہ عدالت کو مطمئن کرنے میں ناکام رہے۔
فریقین کے دلائل سننے کے بعد دو رکنی بینچ نے سزائے موت کے خلاف دائر اپیل مسترد کرتے ہوئے ملزم کی پھانسی کی سزا برقرار رکھنے کا فیصلہ سنایا۔