چیئرمین سینیٹ سید یوسف رضا گیلانی سے پاکستان میں بلغاریہ کی سفیر آئرینا گیناڈیوا گانچیوا نے پارلیمنٹ ہاؤس میں ملاقات کی جس میں دوطرفہ تعلقات، پارلیمانی تعاون، اقتصادی روابط اور عوامی سطح پر روابط کے فروغ سے متعلق امور پر تبادلہ خیال کیا گیا۔
ملاقات کے دوران چیئرمین سینیٹ نے سفیر آئرینا گانچیوا کو اپنی سفارتی ذمہ داریاں کامیابی سے مکمل کرنے پر مبارکباد دی اور پاکستان اور بلغاریہ کے دیرینہ دوستانہ تعلقات کے استحکام میں ان کی خدمات کو سراہا۔
سید یوسف رضا گیلانی نے بلغاریہ اور یورپی یونین کے ساتھ تعاون کے فروغ کے لیے پاکستان کے عزم کا اعادہ کرتے ہوئے بلغاریہ کی مکمل شینگن رکنیت کا خیرمقدم کیا، یورو کرنسی اپنانے پر نیک خواہشات کا اظہار کیا اور اقتصادی تعاون و ترقی کی تنظیم (او ای سی ڈی) میں شمولیت کے لیے بلغاریہ کی خواہشات کی حمایت کا بھی اعادہ کیا۔
چیئرمین سینیٹ نے پارلیمانی سفارت کاری کی اہمیت پر زور دیتے ہوئے دونوں ممالک کے ارکان پارلیمنٹ کے درمیان روابط بڑھانے اور پارلیمانی فرینڈشپ گروپس کے کردار کو مزید فعال بنانے کی ضرورت پر زور دیا۔
انہوں نے سفیر کو بین الپارلیمانی اسپیکرز کانفرنس (آئی ایس سی)، خطے میں امن کے فروغ کے لیے پاکستان کی کوششوں اور سینیٹ کی جانب سے نوجوانوں کی شمولیت، خواتین کو بااختیار بنانے، اقلیتوں کے حقوق، تعلیم اور جامع طرز حکمرانی کے فروغ کے لیے کیے جانے والے اقدامات سے بھی آگاہ کیا۔
ملاقات کے اختتام پر چیئرمین سینیٹ نے سفیر آئرینا گانچیوا کی خدمات کو سراہتے ہوئے اس امید کا اظہار کیا کہ پاکستان اور بلغاریہ کے درمیان دوطرفہ تعاون اور دوستانہ تعلقات مستقبل میں مزید مستحکم ہوں گے۔