جوڈیشل کمیشن آف پاکستان نے ہائیکورٹس میں نئے ججز کی تعیناتی کے لیے امیدواروں کے انٹرویوز کے انعقاد کی غرض سے مختلف کمیٹیاں تشکیل دے دی ہیں۔
اس حوالے سے نوٹیفکیشن چیف جسٹس آف پاکستان کی منظوری کے بعد جاری کردیا گیا ہے۔ نوٹیفکیشن کے مطابق لاہور ہائیکورٹ کی چیف جسٹس عالیہ نیلم سینئر ترین ہونے کے باعث تمام انٹرویو کمیٹیوں کی رکن ہوں گی۔
نوٹیفکیشن کے مطابق انٹرویو کمیٹیاں 4 جولائی تک امیدواروں کے انٹرویوز مکمل کریں گی۔
لاہور ہائیکورٹ اور اسلام آباد ہائیکورٹ کے لیے قائم انٹرویو کمیٹیوں کا چیئرمین جسٹس حسن اظہر رضوی کو مقرر کیا گیا ہے، جبکہ سندھ اور بلوچستان ہائیکورٹس کے امیدواروں کے انٹرویوز کے لیے جسٹس عامر فاروق کو کمیٹی کا چیئرمین نامزد کیا گیا ہے۔
جوڈیشل کمیشن کے مطابق مقررہ شیڈول کے تحت تمام امیدواروں کے انٹرویوز مکمل کیے جائیں گے، جس کے بعد تقرری کے عمل کو آگے بڑھایا جائے گا۔