روس نے ایک بار پھر یوکرین کے دارالحکومت کیف پر ڈرونز اور میزائلوں سے شدید حملے کیے جن کے نتیجے میں کم از کم 10 افراد ہلاک جبکہ 46 سے زائد زخمی ہو گئے۔
یوکرینی فوج کے مطابق حملوں میں رہائشی عمارتوں کو بھی نشانہ بنایا گیا جس کے باعث بڑے پیمانے پر جانی و مالی نقصان ہوا۔ حکام کا کہنا ہے کہ ملبے تلے کئی افراد دبے ہونے کے باعث ہلاکتوں میں مزید اضافے کا خدشہ ہے۔
کیف کے میئر کے مطابق میزائل حملے سے متاثرہ ایک رہائشی عمارت کی ساتویں سے نویں منزل تک متعدد افراد ملبے میں پھنسے ہوئے ہیں، جبکہ امدادی ٹیمیں متاثرہ مقام پر ریسکیو آپریشن میں مصروف ہیں۔
واضح رہے کہ چند روز قبل بھی روس نے یوکرین کے مختلف علاقوں پر ڈرونز اور میزائل حملے کیے تھے، جن میں 8 افراد ہلاک اور 34 سے زائد زخمی ہوئے تھے۔ یوکرینی حکام کے مطابق ان حملوں میں بھی رہائشی علاقوں کو نشانہ بنایا گیا تھا، جس سے بڑے پیمانے پر تباہی ہوئی۔