وزیر دفاع خواجہ آصف نے بھارتی پروپیگنڈے پر ردعمل دیتے ہوئے کہا ہے کہ پاکستان سے شکست کے بعد بھارتی وزیراعظم نریندر مودی شدید دباؤ کا شکار ہیں اور ان کے خلاف چلائی جانے والی مہم سے مودی کی ساکھ بحال نہیں ہو سکتی۔
سماجی رابطے کی ویب سائٹ ایکس پر جاری اپنے بیان میں خواجہ آصف نے کہا کہ بھارت کی جانب سے ذاتی حملوں یا انہیں ذہنی طور پر غیر مستحکم قرار دینے کی کوششوں سے حقائق تبدیل نہیں ہوں گے اور نہ ہی اس سے بھارت کے مسائل حل ہوں گے۔
وزیر دفاع کا کہنا تھا کہ پاکستان سے شکست کے بعد مودی حکومت شدید دباؤ میں ہے، جبکہ ان کے خلاف پروپیگنڈا مہم صرف عوام کی توجہ اصل مسائل سے ہٹانے کی کوشش ہے۔
خواجہ آصف نے مزید کہا کہ بھارتی اپوزیشن رہنما راہول گاندھی بھی مودی کو ملنے والے بین الاقوامی اعزازات پر سوالات اٹھا چکے ہیں جبکہ ایک برطانوی اخبار نے بھی ان اعزازات کی شفافیت اور ساکھ پر تحفظات کا اظہار کیا ہے۔
انہوں نے کہا کہ بیرونِ ملک وزیراعظم مودی کی مصنوعی تشہیر اور تعریف کی کوششیں کامیاب نہیں ہوں گی اور حقیقت کو پروپیگنڈے سے تبدیل نہیں کیا جا سکتا۔