پاکستان کے معروف گلوکار عاطف اسلم کی ایک ویڈیو سوشل میڈیا پر تیزی سے گردش کر رہی ہے، جس میں انہیں دوستوں کے ساتھ کیفے میں موجود ہونے کے باوجود نماز کے لیے وقت نکالتے دیکھا جاسکتا ہے۔
وائرل ویڈیو میں عاطف اسلم ایک کیفے ٹیریا میں دوستوں کے ساتھ کھانا کھا رہے ہوتے ہیں، تاہم نماز کا وقت ہونے پر وہ اپنی مصروفیت روک کر کیفے کے ایک کونے میں نماز ادا کرنے لگتے ہیں۔ وہاں موجود چند افراد نے ان کا یہ منظر موبائل فون میں ریکارڈ کیا اور بعد ازاں ویڈیو انٹرنیٹ پر شیئر کردی۔
ویڈیو سامنے آنے کے بعد مداحوں نے عاطف اسلم کے اس عمل کو سراہا اور کہا کہ شہرت، مصروف زندگی اور لوگوں کی توجہ کے باوجود عبادت کو اہمیت دینا قابلِ احترام بات ہے۔ متعدد صارفین نے ان کے لیے دعائیں کیں اور اسے ایک مثبت مثال قرار دیا۔
عاطف اسلم پاکستان کے نمایاں گلوکاروں میں شمار ہوتے ہیں جنہوں نے اپنی آواز کے ذریعے ملک میں ہی نہیں بلکہ بیرونِ ملک بھی خاص مقام حاصل کیا۔ ان کے کریڈٹ پر متعدد مقبول گیت موجود ہیں اور ان کی آواز پاکستان، بھارت اور دنیا کے مختلف حصوں میں پسند کی جاتی ہے۔
گلوکاری کے ساتھ ساتھ عاطف اسلم روحانی کلام بھی پڑھتے رہے ہیں، جنہیں ان کے مداح خاص طور پر پسند کرتے ہیں۔ ان کے نعتیہ اور روحانی کلام کے مختلف مواقع پر سامنے آنے والے کلپس بھی سوشل میڈیا پر توجہ حاصل کرتے رہے ہیں، اور تازہ ویڈیو نے ایک بار پھر ان کے اسی پہلو کو نمایاں کردیا ہے۔