لاہور ہائیکورٹ نے ایم پی اے ثاقب چدھڑ اور اداکارہ مومنہ اقبال کے تنازع سے متعلق اہم پیش رفت کرتے ہوئے مومنہ اقبال کی بہن ایڈووکیٹ رمشاء اقبال کے خلاف مقدمہ درج کرنے کا حکم معطل کردیا۔
جسٹس عہبر گل نے رمشاء اقبال کی درخواست پر سماعت کی، جس میں جسٹس آف پیس کی جانب سے 30 جون کو مقدمہ درج کرنے کے جاری کردہ حکم کو چیلنج کیا گیا تھا۔
درخواست گزار کے وکلا نے عدالت میں مؤقف اختیار کیا کہ جسٹس آف پیس کا حکم قانون کے مطابق نہیں، جس پر عدالت نے ابتدائی سماعت کے بعد 30 جون کے حکم کو آئندہ سماعت تک معطل کردیا۔
عدالت نے ضابطہ فوجداری کی دفعہ 154 کے تحت کارروائی اور متعلقہ ایس ایچ او کو مقدمہ درج کرنے سے متعلق دی گئی ہدایات پر بھی آئندہ سماعت تک عملدرآمد روک دیا۔
لاہور ہائیکورٹ نے درخواست پر فریقین کو نوٹس جاری کرتے ہوئے کیس کی مزید سماعت 14 ستمبر 2026 تک ملتوی کردی۔