ایران نے تازہ امریکی فضائی حملوں کے جواب میں کویت اور بحرین میں قائم امریکی فوجی اڈوں پر میزائل اور ڈرون حملے کردیے جس کے بعد خطے میں کشیدگی مزید شدت اختیار کر گئی ہے۔
ایرانی سرکاری ٹی وی کے مطابق کویت میں کیمپ عریفجان اور علی السالم جبکہ بحرین میں الجفیر اور شیخ عیسیٰ کے امریکی فوجی اڈوں کو نشانہ بنایا گیا۔
ایران کی پاسدارانِ انقلاب نے اپنے بیان میں خبردار کیا ہے کہ اگر امریکا نے مزید حملے کیے تو خطے میں موجود دیگر امریکی فوجی اڈے بھی ایران کی کارروائیوں کی زد میں آئیں گے۔
پاسدارانِ انقلاب کے مطابق امریکی حملوں کے دوران مشہد جانے والے دو پل بھی نشانہ بنائے گئے جنہیں ایران نے سپریم لیڈر آیت اللہ علی خامنہ ای کے جلوسِ جنازہ کو متاثر کرنے کی کوشش قرار دیا ہے۔
دوسری جانب ایرانی میڈیا کا کہنا ہے کہ امریکی حملوں میں بندر عباس، بوشہر، چابہار، کنارک، ایرانشہر سمیت متعدد علاقوں کو نشانہ بنایا گیا جبکہ اہواز پر حملے میں تین افراد جاں بحق اور متعدد زخمی ہوئے۔