اقوام متحدہ میں پاکستان کے مستقل مندوب عاصم افتخار نے سلامتی کونسل سے خطاب کرتے ہوئے خطے میں بڑھتی ہوئی کشیدگی پر تشویش کا اظہار کیا اور کہا کہ تشدد اور عدم استحکام کا سلسلہ کسی کے مفاد میں نہیں۔
انہوں نے کہا کہ متنازع امور کا پائیدار حل صرف سفارت کاری، مسلسل مذاکرات اور باہمی اعتماد کے ذریعے ہی ممکن ہے۔ عاصم افتخار نے واضح کیا کہ پاکستان کشیدگی میں کمی، جنگ بندی اور علاقائی استحکام کے لیے تعمیری سفارتی کوششیں جاری رکھے ہوئے ہے۔
پاکستان کے مستقل مندوب نے اس بات پر بھی زور دیا کہ حساس مذاکرات کے دوران ایسے بیانات اور اقدامات سے گریز کیا جائے جو غلط فہمیوں اور مزید کشیدگی کا سبب بنیں۔ ان کا کہنا تھا کہ تمام کوششوں کا محور اسلام آباد مفاہمتی یادداشت پر مؤثر عملدرآمد ہونا چاہیے تاکہ خطے میں دیرپا امن اور استحکام کو یقینی بنایا جا سکے۔