وزیراعظم محمد شہباز شریف نے کہا ہے کہ عام آدمی کو اپنی چھت فراہم کرنا حکومت کی اولین ترجیح ہے اور اسی مقصد کے تحت غریب اور متوسط طبقے کو گھر کی سہولت فراہم کرنے کے لیے ”وزیراعظم اپنا گھر اسکیم“ کا آغاز کیا گیا ہے۔
وزیراعظم ہاؤس میں وزیراعظم محمد شہباز شریف کی زیر صدارت “پرائم منسٹر اپنا گھر اسکیم” پر پیشرفت کا جائزہ اجلاس منعقد ہوا، جس میں اسکیم پر ہونے والی پیشرفت اور فنانسنگ کے عمل کا تفصیلی جائزہ لیا گیا۔
اجلاس سے خطاب کرتے ہوئے وزیراعظم نے ہدایت کی کہ اپنا گھر اسکیم پر کام کی رفتار مزید تیز کی جائے تاکہ زیادہ سے زیادہ مستحق افراد اس سہولت سے فائدہ اٹھا سکیں۔ انہوں نے سرکاری اور نجی بینکوں کو بھی ہدایت کی کہ وہ اسکیم کی کامیابی کے لیے زیادہ سے زیادہ فنانسنگ فراہم کریں۔
وزیراعظم نے متعلقہ حکام کو اپنا گھر اسکیم کے لیے عمودی (Vertical) اور افقی (Horizontal) ماڈل ہاؤسنگ منصوبوں کی جامع حکمت عملی ترتیب دینے کی بھی ہدایت کی۔
اجلاس کو بریفنگ میں بتایا گیا کہ اپنا گھر اسکیم کے تحت بینک اب تک 204 ارب روپے کی فنانسنگ منظور کر چکے ہیں، جبکہ 27 ارب روپے کی فنانسنگ جاری کی جا چکی ہے۔ مزید بتایا گیا کہ وزارت ہاؤسنگ اینڈ ورکس اور اسٹیٹ بینک آف پاکستان ہر ہفتے اسکیم پر پیشرفت کا مشترکہ جائزہ لے رہے ہیں تاکہ عمل کو مزید مؤثر بنایا جاسکے۔
اجلاس میں وفاقی وزیر اقتصادی امور احد خان چیمہ، وفاقی وزیر خزانہ و محصولات محمد اورنگزیب، وفاقی وزیر ہاؤسنگ اینڈ ورکس میاں ریاض حسین پیرزادہ، وزیر مملکت برائے خزانہ و ریلوے بلال اظہر کیانی اور متعلقہ اعلیٰ سرکاری حکام نے شرکت کی۔