وفاقی وزیر بحری امور محمد جنید انوار چوہدری سے قازقستان کے سفیر یرزھان کستافین نے الوداعی ملاقات کی، جس میں دونوں ممالک کے درمیان بحری تعاون، تجارت، شپنگ اور علاقائی روابط کے فروغ پر تبادلہ خیال کیا گیا۔
ملاقات کے دوران وفاقی وزیر نے پاکستان اور قازقستان کے درمیان تعلقات کے استحکام میں قازق سفیر کی خدمات کو سراہتے ہوئے کہا کہ بحری شعبے میں تعاون کو مزید وسعت دینے کی ضرورت ہے۔ انہوں نے کہا کہ پاکستان بندرگاہوں، شپنگ، تجارتی سہولت کاری اور علاقائی روابط کے شعبوں میں قازقستان کے ساتھ تعاون بڑھانے کا خواہاں ہے۔
محمد جنید انوار چوہدری نے کہا کہ کراچی، پورٹ قاسم اور گوادر کی بندرگاہیں قازق کارگو کے لیے جدید سہولیات فراہم کرنے کی صلاحیت رکھتی ہیں، جبکہ فری زونز میں مشترکہ سرمایہ کاری اور منصوبوں کے بھی روشن امکانات موجود ہیں۔
وفاقی وزیر کا کہنا تھا کہ پاکستانی بندرگاہیں قازقستان سمیت وسطی ایشیائی ممالک کے لیے ٹرانزٹ ہب کا کردار ادا کر سکتی ہیں، جس سے انہیں خلیجی ممالک، افریقہ اور جنوب مشرقی ایشیا کی منڈیوں تک مؤثر رسائی حاصل ہوگی۔
اس موقع پر قازقستان کے سفیر یرزھان کستافین نے کہا کہ دونوں ممالک کے درمیان دوطرفہ تجارت میں نمایاں اضافے کی گنجائش موجود ہے اور بحری و بندرگاہی شعبوں میں قریبی تعاون سے نئے تجارتی مواقع پیدا کیے جا سکتے ہیں۔
ملاقات میں ادارہ جاتی روابط کو مزید مضبوط بنانے اور پاکستانی بندرگاہوں کے ذریعے قازق تجارت کو سہولت فراہم کرنے کے لیے مختلف عملی اقدامات پر بھی غور کیا گیا۔