راجن پور کے علاقے روجھان کی تحصیل عمرکوٹ میں مبینہ طور پر مضر صحت کھانا کھانے سے ایک ہی خاندان کے 37 افراد کی حالت غیر ہو گئی۔ متاثرہ افراد کو فوری طور پر قریبی اسپتال منتقل کیا گیا، جہاں ایک بچہ دورانِ علاج جان کی بازی ہار گیا۔
ریسکیو ذرائع کے مطابق چار متاثرین کی حالت تشویشناک ہے، جبکہ دیگر افراد کو طبی امداد فراہم کی جا رہی ہے۔
پولیس کا کہنا ہے کہ متاثرہ تمام افراد کا تعلق ایک ہی خاندان سے ہے۔ ابتدائی تحقیقات کے مطابق انہوں نے سویاں کھائی تھیں، جس کے بعد ان کی طبیعت اچانک بگڑ گئی۔ واقعے کی اصل وجوہات جاننے کے لیے تحقیقات جاری ہیں، جبکہ کھانے کے نمونے بھی جانچ کے لیے بھجوانے کا امکان ہے۔