وزیراعظم محمد شہباز شریف نے ملک میں نجی سرمایہ کاری کے فروغ اور پائیدار معاشی ترقی کے لیے پرائیویٹ ایکویٹی فنڈ کے قیام کا لائحہ عمل جلد از جلد پیش کرنے کی ہدایت کرتے ہوئے کہا ہے کہ حکومت نجی شعبے کی قیادت میں سرمایہ کاری، صنعت اور برآمدات کے فروغ کے ذریعے معیشت کو مضبوط اور پائیدار بنیادوں پر استوار کرنے کے لیے عملی اقدامات کر رہی ہے۔
وزیراعظم محمد شہباز شریف کی زیر صدارت نجی سرمایہ کاری کے فروغ اور پائیدار معاشی ترقی سے متعلق اجلاس اسلام آباد میں منعقد ہوا جس میں ملک میں سرمایہ کاری کے فروغ، پبلک ایکویٹی مارکیٹ کی توسیع اور پرائیویٹ ایکویٹی فنڈ کے قیام سے متعلق مختلف تجاویز کا جائزہ لیا گیا۔
اجلاس سے خطاب کرتے ہوئے وزیراعظم نے ہدایت کی کہ ملک میں پبلک ایکویٹی مارکیٹ اور پرائیویٹ ایکویٹی فنڈ کے فروغ کے لیے جامع روڈ میپ جلد تیار کر کے پیش کیا جائے، تاکہ سرمایہ کاری کے لیے مقامی فنڈز کی دستیابی میں اضافہ ہو اور غیر ملکی سرمایہ کاری کے لیے بھی سازگار ماحول فراہم کیا جا سکے۔
انہوں نے کہا کہ پاکستان کی معاشی ترقی کے لیے نجی سرمایہ کاری کا فروغ ناگزیر ہے جبکہ پرائیویٹ ایکویٹی فنڈ معیشت میں سرمایہ کاری بڑھانے، کاروباری سرگرمیوں کو وسعت دینے اور روزگار کے نئے مواقع پیدا کرنے میں اہم کردار ادا کر سکتے ہیں۔
وزیراعظم کا کہنا تھا کہ معدنیات، زراعت، لائیو اسٹاک، توانائی، انفارمیشن ٹیکنالوجی (آئی ٹی) اور دیگر اہم شعبے پاکستان کی معیشت کی ترقی کے بنیادی محرک بننے کی بھرپور صلاحیت رکھتے ہیں اور ان شعبوں میں سرمایہ کاری کے لیے پبلک ایکویٹی مارکیٹ ایک مؤثر ذریعہ ثابت ہو سکتی ہے۔
انہوں نے اس امر کی نشاندہی بھی کی کہ بینکاری شعبے کی جانب سے سرمایہ کاری کا حجم ابھی محدود ہے جس کے باعث متبادل سرمایہ کاری ذرائع کو فروغ دینا وقت کی اہم ضرورت بن چکا ہے۔