حکومت نے جعلی ٹیکس اسٹمپس، جعلی بارکوڈز اور غیر قانونی مصنوعات کے خلاف کارروائی مزید سخت کرنے کا فیصلہ کر لیا ہے جبکہ ایسی اشیا کی ترسیل میں استعمال ہونے والی گاڑیوں کو بھی ضبط کرنے کی قانونی شق شامل کر دی گئی ہے۔
فنانس ایکٹ 27-2026 کے تحت فیڈرل ایکسائز ایکٹ کی دفعہ 26 میں ترمیم کی گئی ہے جس کے مطابق جعلی سگریٹ، مشروبات اور دیگر قابلِ ڈیوٹی اشیا، جو غیر قانونی طور پر تیار، پیدا یا فروخت کی گئی ہوں یا جن پر مقررہ فیڈرل ایکسائز ڈیوٹی ادا نہ کی گئی ہو انہیں ضبط کیا جا سکے گا۔
ترمیم کے مطابق ان غیر قانونی مصنوعات کی نقل و حمل میں استعمال ہونے والی گاڑیاں بھی حکام کی جانب سے ضبط کی جا سکیں گی۔ حکومت کا کہنا ہے کہ اس اقدام کا مقصد ٹیکس چوری کی روک تھام، جعلی مصنوعات کے کاروبار کا خاتمہ اور قومی خزانے کو ہونے والے مالی نقصان کا سدباب کرنا ہے۔