پاکستان ہائی کمیشن لندن نے اعلان کیا ہے کہ بیرونِ ملک مقیم پاکستانیوں کے لیے پنجاب میں جائیداد کی ڈیجیٹل منتقلی کی سہولت اب براہِ راست ہائی کمیشن لندن میں بھی دستیاب ہے، جس سے اوورسیز پاکستانیوں کو مزید آسانی اور سہولت میسر آئے گی۔
پاکستان ہائی کمیشن لندن کی جانب سے سماجی رابطے کے پلیٹ فارم ایکس پر جاری بیان میں کہا گیا کہ یہ اقدام وزیراعظم کے بیرونِ ملک مقیم پاکستانیوں کو بہتر سہولیات اور قونصلر خدمات کے دائرہ کار میں توسیع کے وژن کے مطابق کیا گیا ہے۔
بیان کے مطابق جائیداد کی منتقلی کے لیے اب اوورسیز پاکستانیوں کو نہ تو پاور آف اٹارنی بنوانے کی ضرورت ہوگی اور نہ ہی کسی تیسرے فریق یا ایجنٹ کی خدمات حاصل کرنا پڑیں گی۔ جائیداد کی منتقلی کا عمل براہِ راست جدید ڈیجیٹل نظام کے ذریعے مکمل کیا جائے گا۔
پاکستان ہائی کمیشن نے بتایا کہ اس نئے نظام کے تحت جائیداد کی منتقلی کا عمل شفاف، تیز رفتار اور کم لاگت ہے جبکہ بیرونِ ملک مقیم پاکستانیوں کو اس مقصد کے لیے پاکستان سفر کرنے کی بھی ضرورت نہیں رہے گی۔
ہائی کمیشن کے مطابق اس سہولت کے تحت مسٹر فضل اور ان کے اہلِ خانہ کی جائیداد کی ڈیجیٹل منتقلی کا عمل کامیابی سے مکمل کیا جا چکا ہے جو اس نظام کی مؤثر کارکردگی کی ایک مثال ہے۔
پاکستان ہائی کمیشن لندن نے اس عزم کا اظہار کیا کہ وہ بیرونِ ملک مقیم پاکستانیوں کو جائیداد کی براہِ راست اور ڈیجیٹل منتقلی سمیت قونصلر خدمات کی فراہمی میں ہر ممکن تعاون جاری رکھے گا۔