سوشل میڈیا پر وائرل ویڈیوز اور بنگلا دیشی میڈیا کے مطابق ڈھاکہ کی 13 سالہ انامیکا اختر جوئی کو عدالتی حکم کے بعد ان کا سات ماہ کا بیٹا واپس مل گیا ہے۔
کم عمری میں شادی اور بچے کی تحویل کے تنازع کے باعث انامیکا کی کہانی گزشتہ کچھ عرصے سے سوشل میڈیا پر توجہ کا مرکز بنی ہوئی تھی۔
اطلاعات کے مطابق انامیکا نے الزام عائد کیا تھا کہ بچے کی پیدائش کے چند ماہ بعد انہیں گھر سے نکال دیا گیا اور ان کا بیٹا ان سے الگ کردیا گیا۔ بعد ازاں انہوں نے قانونی مدد حاصل کی، جس پر عدالت نے پولیس کو بچے کی بازیابی کا حکم دیا۔ سماعت مکمل ہونے کے بعد عدالت نے بچے کے بہترین مفاد کو مدنظر رکھتے ہوئے عبوری طور پر اسے والدہ کے حوالے کردیا، جبکہ مستقل تحویل کا فیصلہ اب بھی فیملی کورٹ میں زیرِ سماعت ہے۔
دوسری جانب بچے کے والد شکیل عرف شکیب میاں نے ان الزامات کو مسترد کرتے ہوئے اپنا الگ مؤقف پیش کیا ہے۔ اس معاملے سے متعلق دونوں فریقین کی جانب سے مختلف دعوے سامنے آئے ہیں، تاہم ان کی آزادانہ تصدیق تاحال نہیں ہوسکی، جبکہ قانونی کارروائی بدستور جاری ہے۔